Kakinada : పోగొట్టుకున్న సెల్‌ఫోన్ల భారీగా సేకరణ...
*రూ.1.23 కోట్ల విలువైన 618 సెల్‌ఫోన్లు బాధితులకు అప్పగింత
కాకినాడ జిల్లా : కాకినాడ రూరల్ : ఫాస్ట్ రన్నర్ :
ఆధునిక సాంకేతిక పరిజ్ఞానం, నెట్‌వర్క్ నిఘా, డేటా విశ్లేషణ పద్ధతులను వినియోగించి పోగొట్టుకున్న సెల్‌ఫోన్లను గుర్తించి బాధితులకు తిరిగి అప్పగించడంలో కాకినాడ జిల్లా పోలీసులు మరోసారి సఫలీకృతులయ్యారు. సీఈఐఆర్ పోర్టల్ ద్వారా అందిన ఫిర్యాదుల ఆధారంగా సేకరించిన రూ.1,23,60,000 విలువైన 618 సెల్‌ఫోన్లను బుధవారం బాధితులకు తిరిగి అప్పగించారు.
ఈ సందర్భంగా జిల్లా ఎస్పీ జి. బిందు మాధవ్ మాట్లాడుతూ.. ఇప్పటి వరకు 13 విడతల్లో మొత్తం రూ.8,92,27,000 విలువైన 5,221 పోగొట్టుకున్న మొబైల్ ఫోన్లను సేకరించి బాధితులకు అప్పగించినట్లు తెలిపారు. ప్రజలు సైబర్ మోసాల బారిన పడకుండా అప్రమత్తంగా ఉండాలని సూచించారు
మొబైల్ ఫోన్ దొంగతనానికి గురైనప్పుడు లేదా పోగొట్టుకున్నప్పుడు వెంటనే సిమ్ కార్డును, బ్యాంకు ఖాతాలను బ్లాక్ చేయించుకోవాలని ఎస్పీ సూచించారు. అలాగే సెకండ్‌హ్యాండ్ మొబైల్ ఫోన్లు కొనుగోలు చేసేటప్పుడు అపరిచిత వ్యక్తుల నుంచి కొనుగోలు చేయవద్దని హెచ్చరించారు.
పోగొట్టుకున్న మొబైల్ ఫోన్లను గుర్తించి సేకరించడంలో విశేష ప్రతిభ కనబరిచిన జిల్లా ఐటీ కోర్ పోలీసులను ఎస్పీ బిందు మాధవ్ అభినందించారు.
ఈ కార్యక్రమంలో జిల్లా అదనపు ఎస్పీ ఎం. కిషోర్ కుమార్, ఏఆర్ డీఎస్పీ శ్రీహరి రావు, ఐటీ కోర్ సిబ్బంది, వివిధ పోలీస్ స్టేషన్లకు చెందిన పోలీస్ కానిస్టేబుళ్లు పాల్గొన్నారు.
