Kakinada : రైస్ మిల్లర్స్ అసోసియేషన్ అధ్యక్షుడిగా రామకృష్ణ ఏకగ్రీవ ఎన్నిక..
కాకినాడ జిల్లా : కాకినాడ : ఫాస్ట్ రన్నర్ :
కాకినాడ జిల్లా రైస్ మిల్లర్స్ అసోసియేషన్ నూతన కార్యవర్గం ఏకగ్రీవంగా ఎన్నికైంది. ఆదివారం కాకినాడలోని జిల్లా రైస్ మిల్లర్స్ అసోసియేషన్ కార్యాలయంలో నిర్వహించిన సమావేశంలో సుమారు 123 మంది సభ్యులు పాల్గొని నూతన కార్యవర్గాన్ని ఎన్నుకున్నారు.
అధ్యక్షుడిగా రామకృష్ణను ఏకగ్రీవంగా ఎన్నుకోగా, ఉపాధ్యక్షులుగా పేకేటి నాగేశ్వరరావు, కొయ్య శ్రీనుబాబు, సంయుక్త కార్యదర్శిగా కొత్త బైరవకృష్ణ, కోశాధికారిగా పెద్దిరెడ్డి రామాంజనేయ (బాబి) ఎన్నికయ్యారు.
ఈ సందర్భంగా నూతన అధ్యక్షుడు రామకృష్ణ మాట్లాడుతూ.. రాష్ట్ర ప్రభుత్వం ప్రజా పంపిణీ వ్యవస్థకు పంపిణీ చేసే బియ్యం కోసం కాకినాడ జిల్లాను పైలెట్ ప్రాజెక్టుగా ఎంపిక చేయడం ఆనందంగా ఉందన్నారు. కాకినాడ పోర్టులో ఎలాంటి అక్రమాలు జరగకుండా ప్రభుత్వం గట్టి చర్యలు తీసుకుంటోందని తెలిపారు.
ఒకరిద్దరు చేసే తప్పుల కారణంగా మొత్తం రైస్ మిల్లర్లపై తప్పుడు సంకేతాలు వెళ్లే పరిస్థితి ఏర్పడుతోందని ఆయన అన్నారు. పోర్టు ద్వారా బొండం బియ్యం, పచ్చి నూకలు మాత్రమే ఎగుమతి జరుగుతున్నాయని స్పష్టం చేశారు. రైస్ మిల్లర్ల సంక్షేమం కోసం తన వంతుగా శక్తివంచన లేకుండా కృషి చేస్తానని రామకృష్ణ తెలిపారు.
నూతన అధ్యక్షుడిగా ఎన్నికైన రామకృష్ణను పలువురు రైస్ మిల్లర్లు అభినందించి శాలువాలతో ఘనంగా సత్కరించారు.
