Kakinada : సూర్యారావుపేట తీరంలో ముగిసిన నిమజ్జనోత్సవాలు...
*యుద్ధప్రాతిపదికన పారిశుధ్య పనులు పూర్తి..
కాకినాడ జిల్లా : కాకినాడ రూరల్ : ఫాస్ట్ రన్నర్ :
కాకినాడ రూరల్ మండలం సూర్యారావుపేట తీరంలో ఐదు రోజులుగా వైభవంగా సాగిన వినాయక నిమజ్జనోత్సవాలు ప్రశాంతంగా ముగిశాయి. ఉత్సవాల అనంతరం అధికారులు యుద్ధప్రాతిపదికన చేపట్టిన ప్రత్యేక పారిశుధ్య కార్యక్రమంతో తీరం తిరిగి పరిశుభ్రంగా మారింది.
ఐదు రోజుల పాటు వేలాది విగ్రహాల నిమజ్జనం జరగడంతో పూజా సామగ్రి, పూలు, ప్లాస్టిక్ కవర్లు, కొబ్బరి చిప్పలు, చెక్క పలకలు తదితర వ్యర్థాలు పెద్దఎత్తున పేరుకుపోయాయి. దీంతో అధికారులు ప్రత్యేక పారిశుధ్య బృందాలను రంగంలోకి దించారు. ఉదయం నుంచే సిబ్బంది వ్యర్థాలను వేరు చేసి సేకరించారు.
సేకరించిన వ్యర్థాలు, విగ్రహాల శిథిలాలను జేసీబీలు, ట్రాక్టర్ల సహాయంతో తీరం నుంచి డంపింగ్ యార్డులకు తరలించారు. సందర్శకుల భద్రత దృష్ట్యా ఇసుకలో చిక్కుకున్న చెక్కలు, ఇనుప తీగలను కూడా పూర్తిగా తొలగించారు.
మండల పరిషత్ అధికారి పసుపులేటి సతీష్ ఆదేశాలతో, డిప్యూటీ ఎండిఓ రామాంజనేయులు పర్యవేక్షణలో సూర్యారావుపేట ఇన్‌చార్జి సెక్రటరీ టి.వి.వి. సత్యనారాయణ నేతృత్వంలో వివిధ గ్రామాల కార్యదర్శుల సమన్వయంతో ఈ పారిశుధ్య కార్యక్రమాన్ని నిర్వహించారు. పర్యావరణ పరిరక్షణ, సందర్శకుల భద్రతకు ప్రాధాన్యం ఇస్తూ అధికారులు వేగంగా స్పందించడంపై స్థానికులు, పర్యాటకులు హర్షం వ్యక్తం చేశారు.
