Kakinada : నేరస్థలానికే ఫోరెన్సిక్ ల్యాబ్!...
కాకినాడ జిల్లా : కాకినాడ : ఫాస్ట్ రన్నర్ :
పోలీసులకు ‘మొబైల్ ఫోరెన్సిక్’ బలం..
రక్తపు మరక నుంచి బుల్లెట్ రంధ్రం వరకు అక్కడికక్కడే ఆధారాల సేకరణ...
నేర పరిశోధనలో శాస్త్రీయ ఆధారాల సేకరణను మరింత వేగవంతం చేసేందుకు ప్రత్యేకంగా రూపొందించిన మొబైల్ ఫోరెన్సిక్ వాన్‌ను కాకినాడ జిల్లా పోలీసు కార్యాలయంలో శుక్రవారం జిల్లా ఎస్పీ జి. బిందు మాధవ్ పచ్చజెండా ఊపి ప్రారంభించారు. నేరస్థలానికి నేరుగా చేరుకుని ఆధారాలను గుర్తించడం, డాక్యుమెంటేషన్ చేయడం, సేకరించడం, భద్రపరచడం, ప్రాథమికంగా పరిశీలించడం వంటి సేవలను అందించేలా ఈ వాహనాన్ని రూపొందించారు.
అధునాతన పరికరాలతో మొబైల్ ఫోరెన్సిక్ వాన్...
నేరస్థల పరిరక్షణ, భౌతిక ఆధారాల సేకరణతో పాటు సాధారణ కంటికి కనిపించని ఆధారాలను గుర్తించేందుకు హై-ఇంటెన్సిటీ ఫోరెన్సిక్ లైట్ వంటి అధునాతన పరికరాలు వాహనంలో అందుబాటులో ఉన్నాయి. రక్తం, వీర్యం వంటి జీవ ఆధారాల ప్రాథమిక పరీక్ష, సేకరణ కిట్లు, డీఎన్‌ఏ నమూనా సేకరణ కిట్, మాదకద్రవ్యాలు, పేలుడు పదార్థాల స్క్రీనింగ్ కిట్లు, గన్‌షాట్ రెసిడ్యూ సేకరణ కిట్, బుల్లెట్ హోల్ పరిశీలన కిట్ వంటి పరికరాలను ఏర్పాటు చేశారు.
ట్రేస్ ఎవిడెన్స్ పరిశీలనకు స్టీరియో మైక్రోస్కోప్, డీఎస్‌ఎల్‌ఆర్ కెమెరా, బాడీ-వోర్న్ కెమెరా–జీపీఎస్, సీసీటీవీ/డాష్‌బోర్డ్ కెమెరా, వెయింగ్ బ్యాలెన్స్, మినీ రిఫ్రిజిరేటర్, బార్‌కోడ్ స్కానర్, థర్మల్ ప్రింటర్, జనరేటర్ వంటి పరికరాలు ఉన్నాయి.
డిజిటల్ ఆధారాల సేకరణకు ప్రత్యేక సదుపాయాలు...
డిజిటల్ ఇన్వెస్టిగేషన్ కిట్, ఫోరెన్సిక్ ఇమేజర్, పెన్‌డ్రైవ్‌లు, మెమరీ కార్డులు, ఎస్‌ఎస్‌డీ స్టోరేజ్, డిజిటల్ డివైస్‌ల అక్విజిషన్–ఇమేజింగ్–ట్రయాజ్ టూల్, ఫీల్డ్ ట్రయాజ్ పరికరాలు కూడా ఈ వాహనంలో అందుబాటులో ఉన్నాయి. అనుమానాస్పద అగ్ని, గ్యాస్ ఘటనల్లో గ్యాస్ గుర్తింపు, డిజిటల్ ఆధారాల సేకరణ–భద్రపరచడం వంటి సేవలను కూడా అందించగలదు.
దర్యాప్తులో పోలీసులకు మెరుగైన సహకారం...
మొబైల్ ఫోరెన్సిక్ వాన్ అందుబాటులోకి రావడంతో నేరస్థల స్పందన మరింత వేగవంతం కానుంది. ఆధారాలను సంఘటనా స్థలంలోనే శాస్త్రీయ పద్ధతుల్లో సేకరించడం, వాటి భద్రతను కాపాడటం, కేసుల దర్యాప్తులో పోలీసు అధికారులకు మెరుగైన ఫోరెన్సిక్ సహకారం అందించడం సాధ్యమవుతుందని అధికారులు తెలిపారు.
అధికారులు, సిబ్బంది పాల్గొనడం...
ఈ కార్యక్రమంలో అడిషనల్ ఎస్పీ అడ్మిన్ డాక్టర్ మహంతి కిషోర్ కుమార్, అడిషనల్ ఎస్పీ ఏఆర్ శ్రీనివాసరావు, ఎస్బీ డీఎస్పీ కెవివి సత్యనారాయణ, ఏఆర్ డీఎస్పీ వి.జి. శ్రీహరి రావు, క్లూస్ టీమ్ ఇన్‌స్పెక్టర్ పి. శ్రీనివాసరావు, క్లూస్ టీమ్ ఎస్సై ఎస్. ప్రశాంతి, డీసీఆర్బీ ఇన్‌స్పెక్టర్ వి. శ్రీనివాసరావు, డీటీఆర్బీ ఇన్‌స్పెక్టర్ బి. రాజశేఖర్, రిజర్వ్ ఇన్‌స్పెక్టర్ ఎం. నరసింహమూర్తి తదితరులు, పోలీసు సిబ్బంది పాల్గొన్నారు.
