Kakinada : మహిళల్లో అధికంగా కీళ్ల నొప్పులు
కాకినాడ జిల్లా : కాకినాడ రూరల్ : ఫాస్ట్ రన్నర్ :
మహిళల్లో కీళ్ల నొప్పులు అధికంగా ఉంటాయని, అయితే తొలిదశలోనే గుర్తిస్తే మందులతో నియంత్రించవచ్చని ప్రముఖ నరాలు, ఎముకల వైద్య నిపుణులు డాక్టర్ బోండా సూర్యారావు తెలిపారు.
రమణయ్యపేటలో అడబాల ట్రస్ట్ ఆధ్వర్యంలో నిర్వహించిన అవగాహన కార్యక్రమంలో ఆయన మాట్లాడారు. జన్యుపరమైన కారణాలతోనూ కీళ్ల వ్యాధులు వచ్చే అవకాశం ఉందన్నారు. కీళ్లలో నొప్పి లేదా వాపు, చర్మంపై ఎర్రటి మచ్చలు, అధికంగా జుట్టు రాలడం, దీర్ఘకాలిక జ్వరం, ఆకలి లేకపోవడం, బరువు తగ్గడం, రక్తకణాలు తగ్గడం, కండరాల బలహీనత వంటి లక్షణాలు కనిపించవచ్చని వివరించారు.
కీళ్ల సమస్యల నివారణకు పౌష్టికాహారం తీసుకోవడంతో పాటు క్రమం తప్పకుండా వ్యాయామం చేయాలని, ఒత్తిడిని అధిగమించాలని డాక్టర్ సూర్యారావు సూచించారు.
ఈ కార్యక్రమంలో అడబాల రత్న ప్రసాద్, చింతపల్లి సుబ్బారావు, పి. ధర్మచందర్ రాజు, ప్రసాద్ నాయుడు, రాజా తదితరులు పాల్గొన్నారు.
